વાડ મુખ્ય પ્રાથમિક શાળા (PM SHRI) દ્વારા એકદિવસીય શૈક્ષણિક અને સાંસ્કૃતિક પ્રવાસનું આયોજન
ખેરગામ (નવસારી):
શિક્ષણ માત્ર પાઠ્યપુસ્તકો સુધી સીમિત ન રહેતા, જ્યારે તે અનુભવ સાથે જોડાય છે ત્યારે તે વધુ અસરકારક બને છે—આ વિચારને સાકાર કરવા વાડ મુખ્ય પ્રાથમિક શાળા (PM SHRI), તા. ખેરગામ, જિ. નવસારી દ્વારા તારીખ 21 ડિસેમ્બર 2025ના રોજ એકદિવસીય શૈક્ષણિક અને સાંસ્કૃતિક પ્રવાસનું સુંદર આયોજન કરવામાં આવ્યું હતું.
આ પ્રવાસમાં શાળાના ૧૫૯ ઉત્સાહી વિદ્યાર્થીઓ તથા ૮ માર્ગદર્શક શિક્ષકો જોડાયા હતા. પ્રવાસનો મુખ્ય હેતુ બાળકોને સહકારી પ્રવૃત્તિઓ, સેવાભાવી સંસ્થાઓ, આધ્યાત્મિક વારસો તથા રાષ્ટ્રીય સ્વતંત્રતા આંદોલનના ઇતિહાસથી પરિચિત કરાવવાનો હતો.
પ્રવાસની શરૂઆત નવસારી સ્થિત પ્રસિદ્ધ વસુધારા ડેરીની મુલાકાતથી થઈ હતી. અહીં બાળકોએ દૂધના એકત્રીકરણથી લઈ પાશ્ચરાઈઝેશન અને ઘી, છાશ, આઈસ્ક્રીમ જેવી વિવિધ બનાવટોની પ્રક્રિયા પ્રત્યક્ષ નિહાળી. ગુજરાતના સહકારી ક્ષેત્રની સફળતા જોઈ વિદ્યાર્થીઓ અત્યંત પ્રભાવિત થયા હતા.
ત્યારબાદ પ્રવાસી જૂથએ નાયક ફાઉન્ડેશનની મુલાકાત લીધી, જ્યાં સંસ્થા દ્વારા ચાલતી સામાજિક અને શૈક્ષણિક પ્રવૃત્તિઓ વિશે માહિતી મેળવી. અમલસાડ ખાતે ટૂંકા વિરામ દરમિયાન બાળકોએ પ્રકૃતિનો આનંદ માણ્યો.
બપોરે વિદ્યાર્થીઓએ અમલસાડ સ્થિત સુપ્રસિદ્ધ અંધેશ્વર મહાદેવ મંદિરમાં દર્શન કર્યા. પ્રાચીન સ્થાપત્ય અને શાંતિસભર વાતાવરણમાં બાળકોએ ભારતીય સંસ્કૃતિ અને આધ્યાત્મિક વારસાની અનુભૂતિ કરી.
પ્રવાસનું સૌથી પ્રેરણાદાયક સ્થળ રહ્યું દાંડી સત્યાગ્રહ સ્મારક. અહીં ગાંધીજીની દાંડી કૂચ અને મીઠાના સત્યાગ્રહની ઐતિહાસિક ગાથા અદ્યતન મ્યુઝિયમ, પ્રતિમાઓ અને ડિજિટલ પ્રદર્શન દ્વારા વિદ્યાર્થીઓએ અનુભવી. સમુદ્ર કિનારે વિહાર કરીને બાળકોને પ્રકૃતિ સાથે જોડાવાનો અવસર પણ મળ્યો.
પ્રવાસના અંતિમ ચરણમાં સૌએ મીની પોઈચા (નવાગામ) ખાતે આવેલ ભવ્ય સ્વામિનારાયણ મંદિરની મુલાકાત લીધી. અહીંના આકર્ષક સ્થાપત્ય અને રોશનીએ બાળકોને મંત્રમુગ્ધ કરી દીધા. સમૂહમાં નાસ્તો તથા ભોજન લઈ એકતા અને સહકારનો સંદેશ આપવામાં આવ્યો.
આ સમગ્ર પ્રવાસ શિસ્તબદ્ધ, સુરક્ષિત અને આનંદમય રહ્યો. શિક્ષકોના કુશળ માર્ગદર્શન હેઠળ વિદ્યાર્થીઓએ જ્ઞાન, સંસ્કાર અને અનુભવનું અનોખું સંયોજન મેળવ્યું. મોડી સાંજે સૌ સુરક્ષિત રીતે વાડ ગામે પરત ફર્યા ત્યારે દરેક બાળકના ચહેરા પર નવી ઊર્જા અને શીખવાની ખુશી સ્પષ્ટ જોવા મળી.
